أنا مين؟ أهلا بيكم في مدونتي الجديدة

 أهلا بيكم في مدونتي الجديدة .. هكتب فيها أي حاجة تخطر على بالي .. ممكن تفيدكم أو تكونوا مبسوطين وأنتوا بتقروها .. بيقولوا عني موهوبة في الكتابة .. وفجأة بتجيلي أفكار كتير عاوزة أكتب عنها .. فكرت أعمل مدونة جديدة هنا كنوع من التغيير لأني اتعودت أكتب على صفحتي على الفيس بوك .. 

أعرفكم بنفسي .. اسمي منار العزب .. عندي 32 سنة وشهر 5 اللي جاي هكمل 33 سنة .. شايفة إن دي من أجمل المراحل العمرية في حياتي .. عندي خبرات أكتر واتعلمت حاجات كتير .. وكمان اكتشفت إني بحب مجالات كتير .. وعشان أنا شخصية مزاجية .. وكل شوية بحب أكتب في حاجة .. دي كانت فكرة المدونة 

وكمان لأنها هتكون باب رزق جديد لية من خلال التدوين .. سميتها باسمي (منار العزب) لأنها بتعبر عني ككل .. عن أفكاري ومعتقداتي واتجاهاتي في الحياة .. 

أنا زوجة وأم لبنوتة عندها 3 سنوات اسمها سما 😍 .. وشغلي حاليا في مجال الإرشاد النفسي والأسري .. وعندي جروب على الفيس بوك .. اسمه (استشارتي للدعم النفسي) 

حاليا بشتغل كاتبة مقالات في موقع إلكتروني اسمه الأمنيات برس .. بكتب في الفن والطبخ والأخبار الفنية والأخبار المهمة .. ودايما بسعى إن إسلوبي يكون مميز ويوصل للقلب .. 💗

عاوزة أقولكم إني بحبكم من غير ما حتى أعرفكم .. وكمان بقالي سنتين بكتب في رواية .. ولسة بقالي كام يوم رجعت أكتب فيها تاني .. ممكن على فكرة أنزل مقتطفات منها .. عشان شايفة إنها رواية مهمة وبتتكلم عن إن الحياة هبوط وصعود ومستحيل تمشي على وتيرة واحدة .. بطل الرواية اسمه هاني .. مر بحاجات كتير صعبة في حياته .. وبعد كده .... مش هحرق الرواية طبعًا .. لكن حقيقي مش عشان أنا اللي كتباها .. لكن فعلا هي ممتعة وشيقة .. وفيها أحداث كتير عميقة وبتوصل على طول للقلب .. ودي أهم حاجة إنها توصل لقلوبكم الحلوة .. 

كفاية طولت عليكم هنا .. لكن هتلاقوني كتير بكتب مقالات وموضوعات وحكايات وقصص وحاجات كتير .. ياريت تتابعوني هكون فعلا ممتنة ليكم .. 

تحياتي 💗

منار العزب 😊